मकवानपुर के को हब बन्छ : शिक्षा, उद्योग वा पर्यटन ?

गिरिजा अधिकारी

हेटौंडा । आसन्न प्रतिनिधिसभा र प्रदेशसभा निर्वाचनको सन्दर्भमा मकवानपुरले उही उम्मेदवार र उस्तै पूरा नहुने योजना पाइरहेको छ । स्थानीय तहको निर्वाचनमा उम्मेदवारहरुले सार्वजनिक गरेकै नारा अहिलेको प्रतिनिधि र प्रदेशसभाको निर्वाचनमा पनि उम्मेदवारहरुको एजेण्डा भइरहेको छ । सबैभन्दा हाँसो उठ्दो कुरा त के भने उम्मेदवारहरुले अहिले पनि सडक बनाउने, कुलो खन्ने, स्कूल चलाउने, मेडिकल शिक्षालयहरु खोल्ने जस्ता आधारहीन एजेण्डाहरु बोकेर मतदातालाई झुक्याइरहेका छन् ।

बाम गठबन्धन होस् वा लोकतान्त्रिक गठबन्धनबाट उम्मेदवार बनेकाहरुको भाषण सुन्ने हो भने यो मकवानपुर अबको केही महिनाभित्रै सुनैसुनले छाएजस्तो झलझली र झिलीमिली हुन्छ जस्तो लाग्छ तर व्यवहारमा दशकौँदेखि मकवानपुरवासीले पाएको सुको केही छैन । पटकौँपटक कमल थापाहरु मन्त्री बने, मकवानपुरमा सम्झन लायक सिन्को भाँचेनन् । राजाराम स्याङतान पनि माननीय नभएका होइनन्, अहिलेका उम्मेदवारहरु पहिले पनि माननीय थिए । उनीहरुको कार्यकालमा मकवानपुरमा के के योजनाहरु आए, उनीहरुले निर्वाचनमा बताएका प्रतिवद्धताहरु आजसम्म पूरा भएका छन् कि छैनन, मतदाताले मूल्याङ्कन गर्नु पर्दछ ।

मकवानपुर शिक्षाको क्षेत्रमा निकै पछाडि छ । स्वास्थ्यको हालत दिनानुदिन खराब हुँदै गइरहेको छ । उद्योग कलकारखानाहरु टुस भइसकेका छन् । पर्यटनमा केही काम हुन नसक्दा यो क्षेत्र पनि धरासायी छ ।

मकवानपुरको यो हेटौंडा बजार राजधानी बनाउने चर्चा चलिरहँदा यहाँका उम्मेदवारहरु साँच्चिकै सिरियस छैनन । मकवानपुरलाई केको हब बनाउने, यसबारे अन्तर पार्टीमा कहिल्यै पनि छलफल हुन नसक्नु दूर्भाग्य हो । यहाँ राम्रो शिक्षाको संभावना छ, तर विद्यालय, प्राविधिक विद्यालयमा लगानी गर्नेहरु छैनन । राजधानी काठमाडौँ र छिमेकी देशहरुमा गएर प्राविधिक शिक्षा लिनु बाध्यता बनिरहेको छ । त्यसको व्यवस्थापन मकवानपुरमै हुन सके मकवानपुरको कलेटी परेको मुहारमा केही भएपनि चमक आउने थियो ।
स्थानीय तहमा गाउँपालिका वा वडामा उम्मेदवार भएका र विजयी भएकाहरुलाई तपाइको निर्वाचनको एजेण्डा के हो भनी सोधिएको थियो, सबैको उही विकासे एजेण्डा सार्वजनिक गरे । अझ बढी चर्चामा आएको त भत्ताको । कोही वृद्धलाई भत्ता दिने कोही अपाङलाई भत्ता दिने । जसरी पनि पैसा बाढ्ने योजना मात्र उनीहरुको थियो । सिप बढाउने, भौतिक पूर्वाधारको विकास गर्ने, कलकारखाना खोल्ने, घरेलु उद्योगलाई प्रोत्साहन गर्ने, नाफाखोरी र कालाबजार नियन्त्रण गर्नेजस्ता काम उनीहरुको प्राथमिकता बनेनन् ।
आज साँसदको निर्वाचनको संघारमा हामी छौँ । आज पनि हेटौंडा कस्तो बनाउने भन्ने भिजन कसैसँग छैन । अलिअलि भिजन देखाउनेहरु पनि हावा तालमा हिँडिरहेका
छन् । मकवानपुरमा पर्यटन राम्रो संभावना बोकेको ठाउँ हो, औद्योगिक क्षेत्र पनि बनाउन सकिन्छ । बनाउन सकिने कुरा धेरै छ, तर यि सबै कुराले मात्र बन्दैन । यसका लागि ठोस् योजना चाहिन्छ र साँच्चै गर्छु भन्ने सगरमाथा जत्तिकै आत्मविश्वास पनि चाहिन्छ ।

अहिलेका उम्मेदवार को को सँग छ त मकवानपुर बनाउने योजना ? कृपया बुँदागत रुपमा नागरिकले पढ्न पाए हुने, त्यसपछि भोट हाल्न पाए हुने नि ।
अहिले मतदाताकहाँ चार्दै विवेकशील साझा पार्टी पनि दौडिरहेको छ । आजभन्दा अघि राजनीतिमा सिन्को योगदान नरहेका, मतदाताका दुख वा सुखमा कहिले के कसो छ भनी नसोध्नेहरु निर्वाचनको बेला सबै खत्तम हामी मात्र च्वाँक भन्दै हिडिँरहेका छन् । जनताले साँच्चै बुझ्नै नसकेका यि दलहरुका बारेमा मैले पनि यसै हो भनेर दावी त गर्दिन तर अरुले गरेनन् त्यही भएर हामी गर्छौ भन्ने यि दलले केही गरिहाल्ने छाँट पनि देख्न पाइएन ।
विरालो बाँधेर श्रद्ध गर्ने प्रचलन जस्तै सबैले जनता झुक्याइरहेका छन् । मतदाता झुक्याइरहेका छन् । यसो गर्छु र उसो गर्छु भन्नेहरुले कहिले कहिले कुन मितिमा कति खेर यो मकवनपुरमा के के गर्ने योजना बनाएका छन्, त्यसका लागि स्रोतको व्यवस्थापन कसरी हुन्छ, यस्ता प्रश्नहरुको उत्तर दिन कष्ट गरे हुने नि बरु ।
यो कुनै दल वा पार्टीमाथिको आरोप होइन, यो केबल मकवानपुरको सुन्दर भविश्य निर्माण गर्ने एजेण्डा अलि बैज्ञानिक र वस्तुवादी बनाउन दबाब सिर्जना होस् भन्ने अभिप्राय मात्र हो । एक दिन हामी सबै हुप्रा चौरमा मकवानपुर बनाउने सपना बारे बहस गर्न सकौँ । धन्यवाद ।